"اصل انا وانا ماشى فى العراق لاقيت جثة " جملة كررها (عباس او لطفى ) من بدااية رجوعه من العراق بعد وقوع نظام صدام 2003 فى الحلقة الاولى حتى نهاية المسلسل .
تكررت هذه الجملة فى كل مرة سئل فيها (عباس ) أومال مين لطفى ده ؟!
فعلا حاجة (تمخول ) العقل هو عباس ولا سى لطفى ودى هى الفكرة الجوهرية اللى اراد هذا العمل الذى اصفه بالجميل ان يقدمه .
(عباس ) مدرس تاريخ ظروفه مش ولا بد ولكن عايش بمبادءه عباس شايف ان التدريس رسالة والتاريخ هوية وكان صعب عليه ان مايقولش الحقيقة لما تلميذ بعيون بتلمع يسأله وده نفسه كان سبب ايقافه عن العمل ف مدرسته ! وهو نفسه سبب الحكم عليه بالاعدام لما راح العراق !
(لطفى ) مروض اسود فى سرك مشهور بالعنف والبلطجة والنصب والاحتيال وممكن الندالة كمان ساب مراته وعياله فى مصر وسافر العراق علشان يلاقى حتفه هناك ويبقا جثة مشوة المعالم
عباس اللى كان هربان وهيمان فى شوارع العراق مش عارف مصيره لاقى جثة لطفى المشوة وفى ( لحظة معينة) جاتله فكرة ( شيطانية ) وبحركة بسيطة بدل (عباس) باسبوره بباسبور لطفى بشوية حبر حطهم ع صورة (لطفى) علشان يلزق فيه الاسم والمصير بقيت عمره ...
عباس ظن ان مشاكله اتحلت لما بدل ورقه بورق لطفى ماكنش يعرف ياعينى انها هتزيد وانه هيسدد ديون مش ديونه اولها كان مؤبد 20 سنة او اكتر من عمره قضاهم فى سجن العراق كانوا من نصيب لطفى بقوا من نصيبه هو ده غير ديون لطفى اللى فى مصر والتار اللى عليه اللى ممكن فى لحظة كان يكلف عباس حياته (البائسة) ده غير عدم اعتراف مراته وولاده بيه وحرمانه من ورثه ...
صحيح (عباس) مكنش يستاهل ده كله لكن (لطفى) كان يستاهل وعباس بقا لطفى (وهو شخص محتال نصاب ) لحظة تخليه عن مبادءه و ( تزويره) فى الورق .
وهذا ما يحدث اذا زور مدرس التاريخ التاريخ واشترى ما هو ادنى بما هو اعلى من حياة الذل المهانة وفقد للهوية وللتراث ومشكلات وازمات لم تكن لها حساب مثل الديون والثأر وضياع لابناءه ومستقبل ومصير مالوش معالم زى جثة لطفى كدة .
وما اشبه مشاكل عباس بمشاكلنا اليوم والتى يمكن لها (بالمثل) ان يكون سببها تزوير التاريخ والذى اذا زور انقلب علينا كل شىء ولفقدنا هويتنا ...
وعلشان كدة مشاكل عباس اللى قابلها طول المسلسل كان السر فيها لحظة التبديل (التزوير) وعلشان كدة برده كل ما كان بيقع فى ازمة ويخرج منها والناس تسأله أللا أومال مين لطفى ده ؟ !
يحكيلهم ويقولهم " اصل انا وانا ماشى فى العراق لقيت جثة " ...
تحية ليوسف معاطى وتحية للفنان يحيى الفخرانى وجميع العاملين ع هذا العمل الرائع
تعليقات
إرسال تعليق